2Cor 5 | JAE | STEP | Aêac ajala gebe aêacma bec nomŋa tonec embe etoc su, go Anôtô êkêŋ andu teŋ êndêŋ aêac. Andu tau, taŋ ŋamalac sêkwê ŋa lemeŋ atom naŋ êkô undambê teŋgeŋ.

2 Corinthians 5

1 Aêac ajala gebe aêacma bec nomŋa tonec embe etoc su, go Anôtô êkêŋ andu teŋ êndêŋ aêac. Andu tau, taŋ ŋamalac sêkwê ŋa lemeŋ atom naŋ êkô undambê teŋgeŋ. 2 Amboac tonaŋ aêac aeŋ oliŋ to ajam aweŋ su ma andu undambêŋa gebe êkwa aêac auc. 3 Embe êkwa aêac auc, go têtap aêac sa toôliŋ ŋaôma atom. 4 Aêac aŋgôŋ bec ôliŋŋa tonec amoa, tec aeŋ oliŋ tauŋ toma ŋalêlôm ŋawapacgeŋ. Aêac abe akwalec bec tau tonec su atom, abe asô bec undambêŋa êkwa aêac auc êwiŋ, gebe gêŋ mata jali tau mêŋênam gêŋ mêtê- mêtê auc. 5 Ŋac taŋ kêmasaŋ aêac kêtu gêŋ tonaŋŋa naŋ, Anôtô tau, ma kêkêŋ Ŋalau gêdêŋ aêac kêtu ŋakamaclauŋ.

6 Amboac tonaŋ aêac têntac kêpa su ŋapaŋ ma ajala gebe têm, taŋ amoa ôliŋgeŋ naŋ, kêtôm amoa gamêŋ jaba ma amoa jaêc Apômtau. 7 Aêac alic ŋanô atom, ma akêŋ gêwiŋgeŋ ma tec asa ma lêŋ. 8 Aêac têntac kêpa sugeŋ ma têntac gêwiŋ kêlêlêc gebe awi ôliŋ tonec ŋabec siŋ ma aŋgôŋ ma malacmôkê awiŋ Apômtau. 9 Aêac amoa ma malacmôkê me amoa jaêc, tec atu kêka- kêka gebe Anôtô êlic aêac ênac mataanô ŋajam. 10 Gebe aêac samob oc tatu awê natakô Kilisinê lêpôŋ mêtôcŋa nêmŋa, gebe aêac samob êndêŋ- êndêŋgeŋ tatap ŋagêjô sa êjô ŋajam to sec, taŋ dagôm gêdêŋ têm tamoa toôliŋgeŋ naŋ.

Sakiŋ daê wamaŋa

11 Aêac ajala biŋ atêc Apômtauŋa ŋam tec ajam kôm kêpi lau gebe sênam tauŋ ôkwi. Anôtô kêjala aêacgac ma aê taêc kêka gebe amac ajala aê gêc nêm ŋalêlôm amboac tonaŋgeŋ. 12 Aêac abe awaka tauŋ waeŋ sa êndêŋ amac êtiamêtiam atom. Aêac abe êkêli amac e awaka aêac sa atu amac waem ŋam gebe amac ajô lau, taŋ tetoc tauŋ sa gêŋ dêmôêŋaŋa, mago têtôm gebe tetoc tauŋ sa gêŋ ŋalêlômŋa atom naŋ aweŋ. 13 Aêac embe amoa atôm lau meloc, go amoa amboac tonaŋ êtu Anôtôŋa me embe amoa tokauc ŋawa, go amoa amboac tonaŋ êtu amacŋa. 14 Kilisinê têtac gêwiŋ ŋanô kêkac aêac, tec aêac ajala gebe ŋac tageŋ gêmac êndu kêtu lau samobŋa, amboac tonaŋ tec kêtôm lau samob sêmac êndu sugac. 15 Eŋ gêmac êndu gêjô lau samob su gebe lau, taŋ sêmoa mateŋ jali naŋ, sêmoa mateŋ jali êtu sêmoasiŋ tauŋŋa atom, sêmoa êtu sênam sakiŋ ŋac, taŋ gêmac êndu gêjô êsêac ma gêdi sa naŋŋageŋ.

16 Amboac tonaŋ aêac ajam dôŋ ŋac teŋ ŋa lêŋ ŋamalacŋa kêtiam atom. Gêmuŋgeŋ tec ajam dôŋ Kilisi ŋa lêŋ ŋamalacŋa, mago galoc ajala eŋ amboac tonaŋ kêtiam atom. 17 Amboac tonaŋ ŋac teŋ embe Kilisi êmbiŋ eŋ tôŋ, go êtu gêŋ wakuc teŋ. Alic acgom, gêŋ laŋgwa gêjaŋa su ma gêŋ wakuc mêŋkêsa. 18 Gêŋ samob tonaŋ ŋam Anôtô, taŋ kêkêŋ Kilisi gebe ê wama aêac êndêŋ tau ma kêkêŋ sakiŋ wamaŋa gêdêŋ aêac. 19 Anôtô gêmoa gêwiŋ Kilisi ma gê wama ŋamalac samob gêdêŋ tau. Eŋ taŋ gêjam nêŋ geo kêtiam atom ma kêkêŋ aêac asôm Anôtô gê wama ŋamalacŋa ŋawae lasê. 20 Kilisi kêsakiŋ aêac gebe ajô eŋ su ma Anôtô kêkêŋ aêac gebe alêŋ biŋ amac. Tec ateŋ amac ajô Kilisi gebe Ansuŋ taôm êndêŋ Anôtô gebe ê wama amac êndêŋ tau. 21 Kilisi gêjam kauc sec, mago Anôtô kêkêŋ eŋ kêtu sec ŋam gêjô aêac su gebe aêac, taŋ Kilisi gêbiŋ aêac tôŋ naŋ, tawê kaiŋ Anôtônê biŋgêdêŋ.